Ұлт рухы – ұрпақ мұраты

«Ұлт рухы – ұрпақ мұраты» тақырыбында Алматы қаласында 27-28 мамыр аралығында өткен мәдениет қызметкерлерінің алғашқы мәдени форумына Қызылорда облысының мәдениет қызметкерлерімен бірге Қорқыт ата музейінің қызметкері қатысты.

5 маусымда өтетін референдум ел өміріндегі өзгерістердің институционалдық көрінісіне айналады, деп хабарлады ҚР Мәдениет және спорт министрі Дәурен Абаев Алматыда өткен «Ұлт рухы – ұрпақ мұраты» атты мәдениет форумында.

Ол соңғы айларда елімізде тағдыршешті өзгерістер болып жатқанын, олар мемлекетіміздің жылнамасында мәңгілікке жазылып қалатынын атап өтті. Бұл өзгерістердің институционалды көрінісі референдум болады.

«Президенттің реформалары саяси құрылымның парадигмасын өзгертіп қана қоймайды, олардың қоғамдағы бостандық пен жауапкершіліктің тепе-теңдігін орнықтыруы маңыздырақ. Бұл ірі және күрделі процесс. Азаматтық және саяси бостандықтың кеңеюі қоғамның әр мүшесінің жеке өмірі мен тағдыры үшін жауапкершілігінің артуымен қатар жүруі керек», - деді министр.

Сонымен қатар, министр «ел өміріндегі өзгерістер кезеңі – қоғамның тұтастығы сынға түсер күрделі сәт», деп атап өтті.