Электронды қызмет – оңтайлы тәсіл

ҚОҒАМДА ӨМІР СҮРІП ЖАТҚАН ӘРБІР АДАМ МІНДЕТТІ ТҮРДЕ МЕМЛЕКЕТТІК ҚЫЗМЕТТЕРМЕН ТЫҒЫЗ БАЙЛАНЫС ЖАСАЙДЫ. МЕМЛЕКЕТТІК ҚЫЗМЕТТЕРДІ КӨРСЕТУ – БҰЛ МЕМЛЕКЕТ ПЕН ҚОҒАМНЫҢ ӨЗАРА ІС-ҚИМЫЛЫНЫҢ НЕГІЗГІ ҚҰРАМДАС БӨЛІКТЕРІНІҢ БІРІ. ЗАМАН ІЛГЕРІЛЕГЕЛІ ЖҰРТ ЖАҢА ТЕХНОЛОГИЯНЫҢ ТІЛІН МЕҢГЕРУГЕ ӘЛДЕҚАШАН КӨШКЕН. СЕБЕБІ КӨШТЕН ҚАЛМАУ – УАҚЫТ ТАЛАБЫ. БҮГІНДЕ ЕЛІМІЗДЕ ХАЛЫҚҚА КӨРСЕТІЛЕТІН ҚЫЗМЕТТІҢ БАСЫМ БӨЛІГІ ЦИФРЛАНДЫРЫЛҒАН. ЯҒНИ ҚЫЗМЕТ АЛУШЫЛАРДЫҢ УАҚЫТЫН ҮНЕМДЕУ, ҚАҒАЗБАСТЫЛЫҚТЫ ЖОЮ МАҚСАТЫНДА ЭЛЕКТРОНДЫ КӨРСЕТІЛЕТІН ҚЫЗМЕТТЕРДІ КӨБЕЙТІП, КЕЙБІР МЕМЛЕКЕТТІК ҚЫЗМЕТТЕРДІ БІРІКТІРУ НЕМЕСЕ МҮЛДЕМ АЛЫП ТАСТАУ АРҚЫЛЫ ОЛАРДЫҢ САНЫН АЗАЙТУ БАҒЫТЫНДА ЖҰМЫСТАР ЖҮЗГІЗІЛУДЕ.

Аудандағы Халыққа қызмет көрсету орталығы – тұрғындарға үздіксіз қызмет түрлерін ұсынып отырған еңселі мекемелердің бірі. Бүгінде қоғамның ақпараттық жаһандану кезеңінде талапқа сай жаңашаланып, қызмет алу­дың жаңа форматын ұсы­нып отырған Мемлекеттік корпора­ция қызмет көрсету саласының көшбасшысына айналып отыр. «Цифрлық Қазақ­с­тан» бағдарламасы аясында мемлекеттік қызмет түрлері жаңа­шаланып, барынша сұратылатын құжаттар тізімін азайтып, электронды құжаттар негізінде қызмет көрсету бағытын ұстанған. Халыққа қызмет көрсету орталығында жаңғырту жұмыстарын жүргізудің басты көрінісі – мұнда операциялық залдардың аумағы кеңейтілген. Сонымен қатар тосқауылсыз қызмет көрсету үлгісі де енгізілген. Техникалық құрал-жабдықтар, компьютерлер мен жиһаздар заманауи үлгіге жаңартылып, операциялық залдарда дайын құжаттарды беру, күту орындары, e.gov.kz ақпараттық жүйесі, өзіне-өзі қызмет көрсету аймағы, азаматтарға ыңғайлы сезіну үшін барынша жағдай жасалған.

– Қазіргі таңда мемлекеттік қызметтердің 90 пайыздан астамын электронды түрде алуға мүмкіндік бар. Тұрғындар бұрын­ғыдай халыққа қызмет көрсету орталығына барып, уақыт өткіз­бей-ақ қажетті қызметтерге қол жеткізе алады. Өткен жылдағы пандемия осы қызметтің оңтай­лылығын халыққа үйретті. Осы орайда бүгінде электронды цифр­лық қолтаңба алуға тапсырыс берушілердің қатары едәуір артты. Мұнан бөлек, TelegramBot, EgovKzbot2.0 қосымшасы арқылы – 33 мемлекеттік қызмет, eGov mobile қосымшасы бойынша – 123 мемлекеттік қызмет, үшінші тұлға арқылы анықтама алу – 21 қызмет, ал бір реттік құпия сөз арқылы – 120-дан астам мемлекеттік қызмет көрсетілді, – дейді аудандағы халық­қа қызмет көрсету орталығы бөлімінің басшысы Ерлан Оспанов.

Аудандағы орталықтың реттеу залында қызмет алушы азамат­тарға сапалы әрі жылдам қызмет көрсету үшін «Өзіне-өзі қызмет көрсету секторында» 6 жұмыс орны, мүмкіндігі шектеулі тұлғаларға қызмет көрсету үшін 1 орын, құжаттарды қабылдау секторында 4 орын, дайын құжаттарды тарату бойынша 1 орын, басқа да қызмет түрлеріне 4 орын қарастырылған.

Қазіргі таңда Халыққа қыз­мет көрсету орталығының аудан­дағы бөлімінде өткен жылдан бергі уақытта 15212 азаматқа электрондық сандық қолтаңба берілсе, «Connection point» жү­й­есі арқылы 96976 қызмет көрсетіліпті. Электрондық сандық қолтаңбаларын пайдалануды үйре­те отырып, бірқатар электронды түрде анықтамаларды өздері алуларына жұмыстар тұрақты жүргізіліп, 107367 азаматқа үй­реткен. Нәтижесінде есепті мер­зімде 80 қызмет түрі бойынша 2394 өтініш қабылданып, 23772 құжат азаматтарға табысталған.

– Халыққа қызмет көрсету ор­талығы әрбір азаматтың уақы­тын үнемдеуді көздеп, қызметті жылдам әрі тиімді көрсетуде. Халыққа сапалы, мәдениетті қызмет көрсету біздің басты міндетіміз. Алдағы уақытта әрбір адам өзіне қажетті құжатты үйден шықпай, кезек күтпей-ақ алатын болады. Біз электронды қызмет алуды әр келушіге насихаттап, түсіндірудеміз. Ол жұмыстар нә­тижесін беруде. Бұдан кейін де заман талабына сай электронды қызмет түрінің ауқымы кеңейе түспек, – дейді бөлім басшысы.