«AMANAT» партиясы республикалық штабының мүшесі, Ғалым Әміреев Қармақшы ауданындағы Ақтөбе ауылының тұрғындарымен кездесті. Басқосуда фракция мүшесі жалпыхалықтық референдумның маңызына тоқталып, ауыл азаматтарына дауыс берудің ережелері мен шарттарын түсіндірді. Кездесуде қатысушылардың сұрағына нақты жауап берген Мәжіліс депутаты әр баптың өзгерісіне жеке-жеке тоқталды.

«Біз болашақ даму жолымызды бүкіл ел болып бірлесе шешкелі отырмыз. Бұл қадам ел ертеңі үшін әрбір азаматтың ой-пікірінің қаншалықты маңызды екенін, жаңа мемлекет құруда өзінің де үлес салмағы барын сезінуге мүмкіндік береді. Сондықтан ортақ ұмтылысымыздың нәтижелі болатынына сеніммен қараңыздар. Конституцияға ұсынылып отырған түзетулердің ел үшін маңызы зор, олар қазір белсенді трансформация кезеңіне өтіп жатқан қоғамға бағдарланған. Осы ортақ істе біз қазақстандықтар ретінде өзіміздің азаматтық ұстанымымызды көрсетуіміз керек– деді депутат Ғалым Әміреев.

Кездесу соңында ауыл тұрғындары депутаттарға өз ықылыстарын білдіріп, жалпыұлттық референдум өткізу бастамасын қолдайтынын және Жаңа Қазақстан құру жолында мемлекетке үлкен сенім артатынын жеткізді.