Үстел теннисінен үздіктер қатарында
Жақында Сырдария ауданы, Нағи Ілиясов ауылында «Дене шынықтыру және спорт кешенінде» «Абзал и К» ТС жүлдесі үшін үстел теннисінен жасөспірімдер мен жас жеткіншектер арасында облыстық турнир өтті. Онда жерлесіміз Айару Аязбаева ІІІ орынға қол жеткізіп, Алматы қаласында өтетін Қазақстан Республикасының чемпионатына жолдама алды.
Облыстық турнирге 7 ауданнан 35 спортшы қатысса, 5 топтан 7 ойыншы шығып өнер көрсеткен. Ал финалдық бәсекеге 2 спортшыдан шығып отырған. Соның ішінде жас спортшымыз Айару екі қарсыласынан ғана жеңіліп ІІІ орынға табан тіреді. Осылайша 2007 жылғылар арасында өтетін ҚР чемпионатына жолдама алды.
А.Аязбаева Байқоңыр қаласындағы №275 мектептің 3 сынып оқушысы. Ол үстел теннисімен 5 жасынан бастап айналысып келеді. Спортта жүріп аудан аралық жарыстардан және облыстан екі рет жеңімпаз атанған. Жаттықтырушысы шәкіртінің бұл спортқа деген ынтасы ерекше екенін жеткізді.
– Шәкіртімнің спортқа қызығушылығы өте жоғары. Ол дайындықтан ешқашан қалған емес және менен бұрын келіп отырады. Айтқаныңды тез қағып алып, соны орындап береді. Жарыстарда өзін көрсете алады. Жалпы спортшының психологиясы мықты болса, ол кез келген жерде өзін алып шығады. Одан бөлек, басқа да жеңіс тұғырынан көрініп жүрген шәкірттерім бар. Қазір олармен қызу дайындық үстіндеміз, – деді жаттықтырушы Азамат Сайлаубекұлы.
Ерсін ӘБЛӘКИЕВ
