Тұлпар мініп, ту алған

Бірнеше жыл бұрын республика көлемінде қолға алынған «Тұлпар мініп, ту алған» ұлттық жобасы биыл да жалғасын табуда. Бұл байқаудың мақсаты – әманда ел тағдырын биік қойған ерлік дастандарымен өскелең ұрпақты сусындатып қана қоймай, ықылым заманнан бері келе жатқан жыршылық дәстүрді қайта жандандыру.

Тарихи эпосты жаттау арқылы оқушы тарихты да терең түсіне бастайды. Шәкірт жадында жатталған мәтін оның сөйлеу мәдениетін, са­уатты жазуын қалыптастырады. Осылайша, бабаларымыздан қалған көне сөздерді, фольклорымызды санасына сіңіріп, Отанын сүйетін, тарихи жәдігерін қастерлей білетін ұл-қыз өсіп шықпақ.

Бұл жобаның тағы бір құндылығы – эпостық жыр-дастандарға құрметті арттырып, оны қалың оқырманға кеңінен насихаттайды. Мектеп оқушыларының кітапқа қызығушылығын арттырады. Олар асыл мұраның құнын түсініп, дастандардағы батырлардай қайсарлық пен намысшылдықты бойына жинайды.

Қарап отырсақ, бұл байқаудың оқушыға бе­рері мол. Алдағы уақытта жырды қаржылай сый үшін емес, өзі үшін жаттап, рухани тәлім алар жас буынның қатары көбейсе деген тілек бар.