Құрылысы қарқын алған «Қожантай»
Қармақшы ауданы әкімінің бастамасымен көптен күткен «Қожантай» су тоспасына жөндеу жұмыстары басталды. Жөндеу жұмыстарын "Қызылордасушаруашылығы" облыстық коммуналдық мемлекеттік кәсіпорны жүргізуде.
Бүгін аталған жұмысты бақылау мақсатында аудан әкімінің орынбасары Ж.Еркусаев Қараөзек арнасы бойында орналасқан «Қожантай» су тоспасының жұмысымен танысты.
Қараөзек арнасы бойында орналасқан «Қожантай» су тоспасы өңірде мал және балық шаруашылығын дамытуға, жаңа жұмыс орындарын ашуға бағытталған, әлеуметтік-экономикалық маңызы зор нысан болып табылады.
Қараөзек аумағында ірілі-ұсақты 27 шаруа қожалықтары мен ауыл шаруашылық құрылымдарының пайдалануында 27,0 мың гектар жер бар. Бұл қожалықтар негізінен мал шаруашылығымен айналысады.
Жөндеу жұмыстары аяқталса мал басы көбейіп, балық шаруашылығы да дамиды. Қараөзек арнасындағы су деңгейін реттеу арқылы қажетті уақытында аймақта орналасқан Досымкөл, Қызылкөл, Жайынкөл, Тасқын, Кетебай-Масақ, Қаракөл-1, Қаракөл-2, т.б ондаған көлдерді сумен толтырып, балық шаруашылығын өркендетуге қол жеткізіледі және қолайлы экологиялық жағдай қалыптасатын болады.
