«Дельта» штамы жастар арасында көп таралып жатыр – эпидемиолог
Вирус жұқтырғандардың 37%-ы - 20 мен 40 жас аралығындағы алматылықтар. Бұл туралы қалалық санитарлық-эпидемиологиялық бақылау бөлімі басшысының орынбасары Әсел Қалықова өңірлік коммуникациялар қызметінің баспасөз мәслихаты барысында айтты, деп жазады Egemen.kz.
Эпидемиологтың айтуынша, вирустың «дельта» штамы Ухань штамынан екі есе жұқпалы. Сонымен қатар ауру салыстырмалы түрде ауыр өтеді және бүкіл денеге екі есе тез әсер етеді.
«Соңғы екі апта вирус жұқтырғандарға талдау жасасақ, жасөспірімдердің үлесі 0,7%-ға, ал 40-59 жастағы азаматтар - 0,8%-ға артқанын көрсетті. Негізінен, 20 жастан 40 жасқа дейінгі адамдар арасында вирус жұқтырғандар көбірек - 37%, 40-59 жастағы азаматтар - 25%, 60 жастан асқан адамдар - 19% және 14 жасқа дейінгі балалар - 13% құрап отыр», деді Ә.Қалықова.
Санитарлық-эпидемиологиялық бақылау департаменті бастығының орынбасары қолда бар вакциналар коронавирустың жаңа нұсқасынан қорғайтынын атап өтті. Сонымен қатар карантин талаптарын қатаң сақтау, бетперде тағу, адам көп шоғырланатын жерге бармау керектігін тағы бір ескертті.
