Бос жұмыс орны жәрмеңкесі

Шараны ашқан аудан әкімінің орынбасары Жарқын Омаров, бос жұмыс іздеп келген тұрғындарға жәрмеңке мүмкіншілігін барынша пайдаланып, көкейдегі сауалдарын қоюға шақырды.

Жәрмеңкеге келгендерге «Азаматтарға арналған үкімет» мемлекеттік корпорациясының «Электронды үкімет» порталы арқылы көрсетілетін мемлекеттік қызметтерді алу тәртібі мен олардың тиімділігі туралы кеңінен түсіндірілді.

Бүгінде ауданда жұмыссыз 724 адам тіркелген. Кент әкімі аппаратына қарасты «Толғанай» балабақшасы, №105 мектеп-лицейі, Төребай би ауылдық клубы, №111 мектеп және жеке кәсіпкер Ш.Кәрібаевтың «Нұр» шайханасы, кәсіпкер Б.Несіпбаевалар мекемедегі бос орындар бойынша тиісті мамандарға сұраныс жасады. Бос орындар жәрмеңкесі барысында 37 аудан тұрғыны жер қатынастары, құрылыс, сәулет, әлеуметтік сала бойынша қызметтерді алу жөнінде кеңес алса, кәсіп ашамын дегенге гранттар мен несие жайында мәліметтер берілді.

Жәрмеңкеден соң аудан әкімдігінің мәжіліс залында Әдеп жөніндегі кеңес төрағасының қатысуымен қоғамдық кеңес өтті. Күн тәртібінде былтыр аудан бойынша ұсынылған мемлекеттік қызметтің сапасына, қол жетімділігіне жүргізілген мониторингтің қорытындысы қаралды. Онда аудан әкімі аппараты басшысының міндетін уақытша атқарушы Айбек Досановтың өткен жылы ауданда ұсынылған мемлекеттік қызметтердің жайы туралы және Қазақстан Республикасы мемлекеттік қызмет істері агенттігінің облыс бойынша департаментінің мемлекеттік қызметтер басқармасының басшысы Ғалымжан Ілкібаевтың баяндамасы тыңдалды.

Кеңес барысында ҚР Мемлекеттік қызмет істері агенттігінің облыс бойынша департаментінің басшысы, Әдеп жөніндегі кеңес төрағасы Нұрман Талқанбаев мемлекеттік көрсетілетін қызметтер сапасын жақсарту туралы біршама мекеме бөлім басшыларына сұрақтар қойып, ұсынысын жеткізді. Мемлекеттік қызмет түрлерінің сапалы орындалуын және белгіленген мерзімін қатаң сақтау, көрсетілетін қызметтерді «электрондық үкімет» веб-порталы немесе «Азаматтарға арналған үкімет» корпорациясы арқылы көрсету мүмкіндігі болса да қызметті берушілермен қағаз түрінде көрсетілетін қызметтің үлесін азайту керегін айтты. Сонымен бірге ішкі бақылау жұмыстарын сапалы және тұрақты түрде жүргізу, ресми интернет ресурстағы салалар бойынша қабылданған стандарттарды өзектендіру жұмыстарын уақытылы жүргізуге ұсыныс беру жайлы қаралды.

Жиыннан соң әдеп жөніндегі өкіл халыққа қызмет көрсететін мекемелерге, яғни аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі, «Жұмыспен қамту орталығы», аудандық емхана, ХҚКО-на арнайы ат басын бұрып ондағы қызметкерлердің жұмыс сапасын пысықтады. Түстен кейін «Nur Otan» партиясы аудандық филиалында кент тұрғындарына қабылдау өткізіп, бірқатар мәселенің шешімін табуға көмектесті.