2 жылда 2000 жейде
Ұлы Абайдың «Үшінші» қарасөзінде: «Һамма ғаламға белгілі данышпандар әлдеқашан байқаған: әрбір жалқау кісі қорқақ, қайратсыз тартады, әрбір қайратсыз, қорқақ, мақтаншақ келеді, әрбір мақтаншақ қорқақ, ақылсыз, надан келеді, әрбір ақылсыз надан, арсыз келеді; әрбір арсыз жалқаудан сұрамсақ, өзі тойымсыз, тыйымсыз, өнерсіз, ешкімге достығы жоқ жандар шығады» деп жазады. Әрине, еңбекпен келген дәм тәтті. Ал дәметуде дәм бола ма? Қазіргі қазақ қоғамында «Құдай маған ештеңе бермей жатыр» деп налып жүргендер қаншама. Абай сөзіне үңіліп көрелік, «Әуелі Құдайға сыйынып» дегені – әрекет қыл дегені емес пе? Ал «Әрекет түбі – берекет».
Бар. «Мен» деп жалындап тұрған жастар бар. Өз қайратына сүйеніп, ақылы мен біліміне, парасаты мен білігіне сеніп, іс қылған жастар бар. Сондай жатпай, тоқтамай, отырмай, еңбегін сауып жүрген жанның бірі – Нұрлыбек Қадыров. Ол ерекше кәсіпті қолға алған. Оның «Кadyrov Wear» отандық брэнді қазақи нақыштағы жейде мен жемпір өндіреді. 2 жылдың төңірегінде 2000-нан астам жейде шығарып үлгеріпті.Оның ішінде «Nagyz qazaq dombyra», «Qazaqtyn erketaiy sen ademi», «Qazaq», «Ar qazaq menin zhalgyzym», «Qazaq qyzy» секілді жейделер елдің әр түкпіріне таралуда.
– Бұл киімді шығаруға көп ой себепші болды. Мақсат – ұлттық мəдениетініміздің дəрежесін жоғары көтеру, қазақы нақыштағы киімдерді, қазақ брендін шет елге дəріптеу. Қазіргі таңда Байқоңыр жəне Ақтөбе қаласында 2 дүкеніміз ашылғалы жатыр. Алдағы уақытта отандық брэнд киімдер дүкенін əр облыстың кеңінен танылған ойын-сауық орталықтарында ашатын жоспарымыз бар, – дейді Нұрлыбек Қадыров.
Шағын және орта бизнесті дамыту – бүгінгі күннің басты талабы. Осы мақсатта мемлекет тарапынан біршама жұмыс жүргізілуде. Түрлі бағдарлама аясында оқу курсы да қарастырылған. Соның бірі – жастар жылына сәйкес ұйымдастырылған «Жас кәсіпкер» жобасы.
– Кәсіп бастау үшін ең алдымен осы курсты оқыдым. Курсты аяқтаған соң, қайтарымсыз несие алуға құжат өткізіп, жоба қорғадым. 505 мың теңге көлемінде грант ұтып, бүгінде жеке кәсіп иесімін, – дейді жас кәсіпкер.
Еңбек – бәрін жеңбек. Ұлт жаппай еңбекқор болғанда ғана ел еңсесі биіктейді. Сондықтан қазекемнің «Еңбегі аздың өнбегі аз» деген сөзі кез келген қоғам мүшесінің қаперінде болғаны жөн.
Айнұр ӘЛИ
