Ресейдегі 36 құс фабрикасының өнімдерін Қазақстанға әкелуге тыйым салды. Бұл туралы Qamshy.kz ақпарат агенттігі ҚР Ауыл шаруашылығы министрлігіне сілтеме беріп хабарлайды.
Халықаралық эпизоотиялық бюросы Ресейдегі Курск, Пенза және Самара облыстарында жоғары патогенді құс тұмауын тіркеді.
Бюро таратқан ақпаратқа сәйкес, жабайы құстардың келуіне және құс тұмауының қаупі салдарынан бұл аумақтардағы эпизоотиялық жағдай өрши түскен. Осыған орай, Қазақстан Республикасының Ауыл шаруашылығы министрлігі 2018 жылдың 21 маусымынан бастап ветеринариялық-санитариялық бақылау және қадағалауды жүзеге асыратын азық-түлік қауіпсіздігі саласындағы мемлекеттік саясатты іске асыру аясында Қазақстан Республикасы аумағына тірі құс еті мен инкубациялық жұмыртқа, жүн және қауырсындар, құс еті мен құстың барлық өнімдерін әкелуге тыйым салды.
Сонымен қатар, жылы өңдеуден өтпеген құстарға арналған жемшөп пен жемшөп қоспалары, таксидермиялық өңделмеген аңдар әрі Ресейдің аталған аймақтарынан құстарды сақтауға, кесуге арналған жабдықтарға тыйым салынды.