Ұлттық банк базалық мөлшерлемені 9,75 пайызға дейін төмендетті
Бір жыл бұрын бұл көрсеткіш 12 пайыз еді. Ал жылдық инфляция 2017 жылғы желтоқсанда 7,1% болған. «Бұл біз күткен 7,5-7,7%-дан айтарлықтай төмен», – деді еліміздің бас банкирі Данияр Ақышев. Биыл да Ұлттық банк инфляцияны 5-7% аралығында сақтауды болжап отыр. Сыртқы жағдай да қолайлы қалыптасуда. Қазанның соңынан бері мұнай бағасы тұрақты түрде 1 баррель үшін 60 доллардан жоғары саудаланып келеді. ОПЕК елдерінің қара алтын өндіруді қысқарту туралы уағдаластықты 2018 жылдың соңына дейін ұзартуы бағаны арзандатпауы керек. Базалық мөлшерлеме бойынша кезекті шешім 5 наурызда жарияланады.
Данияр Ақышев, ҚР Ұлттық банкінің төрағасы:
- Инфляцияның баяулауы жекелеген тауарлар мен қызметтер нарығындағы бағалардың тұрақтануымен байланысты. Атап айтсақ, күзде қымбаттаған бензин бағасы желтоқсанда арзандады. Тұтынушылық сұраныс төмендеген соң, ұзақ пайдаланылатын тауарлардың құны жай өсіп жатыр. Сонымен қатар теңгенің айырбастау бағамының төмен құбылмалы болуы да жылдық инфляцияның баяулауына септігін тигізді.
Пікір 1