Венецияда дәстүрлі карнавал басталды
Венецияда көпшілік асыға күтетін дәстүрлі карнавал басталды.
Ұйымдастырушылар жиылған жұртты таң-тамаша қалдыру үшін итальяндық режиссер Федерико Феллинидің фильміне негізделген қойылым көрсетті. Сонымен қатар биікте керілген арқанда жүріп, би билейтіндер мен акробаттар, сайқымазақтар өнері көпшілікке ұсынылды.
Жалпы Венеция карнавалы – ежелден келе жатқан дәстүрлі шара. Оның шығу тарихы VI ғасырдан бастау алады. Байырғы тұрғындар карнавалды Пасха мерекесінің алдында ұстайтын 40 күн ораза басталардан бұрын тойлаған. Карнавал 2 аптаға созылады. Оны тамашалау үшін әлемнің түпкір-түпкірінен мыңдаған турист келеді. Саяхатшылардың көбі көздің жауын алатын түрлі түсті киімдер мен су бетіндегі шеруді тамашалап, балл-маскарадқа қатысуды қалайды. Биыл дәстүрлі шара 13 ақпанға дейін жалғасады.
