Италияда 75-ші Венеция кинофестивалі басталды
Конкурста жалпы саны 21 туынды байқауға түседі.
Фестивальде былтыр «Cу пішіні» фильмі үшін «Алтын арыстан» жүлдесін иеленген мексикалық режиссер Гильермо дель Торо әділқазы төрағасы болып тағайындалды. Онымен бірге Наоми Уотс, Кристоф Вальц, Тайка Вайтити сынды кино әлемінің жұлдыздары да туындыларға өз бағасын береді. Шараның шымылдығын Дэмиен Шазелланың «Айдағы адам» картинасы ашады. Бұл фильм айға ең алғаш ұшырылған адам Нил Армстронг туралы түсірілген.
Айта кетейік, кинофестиваль 8 қыркүйекке дейін жалғаспақ.
Альберто Барбера, Венеция кинофестивалінің директоры:
- Фестивальге Леди Гага, Брэдли Купер, Натали Портман келеді. «Алтын арыстан» жүлдесі үшін биыл жиырмадан астам туынды күреседі. Оның біреуін әйел адам түсірген. Бірақ келешекте жағдай өзгереді деп ойлаймын. Менің жұмысым тек фильмдердің сапасын қадағалап, бекіту.
24.kz
