«Титаник» жолаушысының хаты аукционда шамамен 80 мың долларға сатылды
Фото: rg.ru
«Титаник» жолаушысының апаттан бірнеше күн бұрын жазған соңғы хаты Ұлыбританияда өткен аукционда 60 мың фунт стерлингке (шамамен 80 124 доллар) сатылды. Бастапқыда бұл лот ең көбі 35 мың фунт стерлингке бағаланған болатын. Генри Прайс Ходжестің хаты Ұлыбританияның Уилтшир графтығындағы Девизес қаласындағы аукцион үйінде саудаға шығарылды, деп хабарлайды Egemen.kz.
Жолаушы Бостон қаласындағы туыстарына қонаққа баруды жоспарлаған. Хат Квинстаун қаласынан жіберілген. Онда Ходжес сапары жайлы баяндап, лайнердегі ахуалды сипаттайды. Ол ауа райының қолайлы екенін айтып, жолаушылардың ойын ойнап, кітап оқып және түрлі істермен уақыт өткізіп жатқанын жазған.
Хатының соңында Ходжес қатты шаршағанын айтып, ерте ұйықтауға ниетті екенін жеткізген. Алайда осы хат жазылғаннан кейін 5 күн өткен соң «Титаник» Нью-Йоркке бет алған сапарында Айсбергке соғылып, суға батты. Генри Прайс Ходжес шамамен 1,5 мың адаммен бірге қаза тапты. Кейін оның мәйіті табылып, Канаданың Галифакс қаласындағы Фэрвью зиратына жерленді.
Аукциондағы тағы бір құнды жәдігер – үшінші кластағы жолаушы Эрнест Томлиннің денесінен табылған бір долларлық банкнот болды. Ол 37 мың фунт стерлингке сатылды. Банкнот Томлиннің кеудешесіне тігіліп сақталған екен. Бұл лот та рекордтық бағаға өтіп, оның сатылу құны бастапқы бағалаудан шамамен 4 есе жоғары болды.
Айта кетейік, үш жыл бұрын «Титаник» жолаушысының лайнер бортында жазылған хаты Уругвайдағы аукционда 12 мың долларға сатылған болатын. Бұл хат 1912 жылы 11 сәуірде жазылған. Оны уругвайлық Рамон Артагавейтия Гомес ағасына жазған.
