Титаникте жазылған ғашықтық хат аукционға қойылды
Апатқа ұшыраған Титаник кемесінің бортында жазылған ғашықтық хат аукционға қойылды.
Бұл туралы moya-planeta.ru хабарлады.
Хат апаттан тірі қалған Кейт Басс есімді әйелге тиесілі болған. Кейт жазбаны кеме Саутгемптоннан шыққан бетте, яғни 1912 жылдың 10 сәуірінде жазыпты. Содан бері хат Басс отбасында сақталған. Хатта ол кемедегі сапары жайында баяндаған.
Кейт Басс – Титаник суға батқанда құтқарылған жолаушылардың бірі және ол 96 жасқа дейін өмір сүріп, 1972 жылы көз жұмған. Хаттың бастапқы бағасы – 30 мың доллар. Былтыр осы кемеде қаза тапқан жолаушының хаты 166 мың долларға сатылған болатын.
