Crew Dragon ғарыш кемесі алғашқы орбиталық рейсін жасады
2025 жылдың 1 сәуірінде Crew Dragon ғарыш кемесі жер полюстерінің үстіндегі алғашқы орбиталық рейсін бастап, ғарышқа ұшты, деп хабарлайды Egemen.kz.
Кеннеди ғарыш орталығының 39А ұшыру кешенінен АҚШ-тың жергілікті шығыс уақыты бойынша 21:46-да (Астана уақыты бойынша 6:46) көтеріле отырып, кеменің сапары 3-5 күнге созылмақ. Бұл ұшу 425-450 км биіктікте өтеді.
Айта кетейік, бұл миссия ерекше, себебі экипаж тек азаматтық тұрғындардан тұрады. Оның құрамында қытайлық криптовалюта кәсіпкері Чун Ванг, Германиядан келген арктикалық робототехника инженері Рабеа Патрисия Рогге, австралиялық полярлық зерттеуші Эрик Филипс және норвегиялық режиссер Яннике Миккелсен бар.
Миссияның негізгі мақсаты – полярлық мұз қабаттары мен шалғай аудандардың климаттық ерекшеліктерін зерттеу. Fram2 миссиясы климаттың өзгеруі мен жердің ең экстремалды аудандарын зерттеуге үлес қосып, ғарыш ұшуының адам денесіне әсерін зерттеуге мүмкіндік береді. Сонымен қатар, экипаж мүшелері 22 ғылыми зерттеу мен экспериментті жүзеге асырады.
