51 жастағы француз Бенуа Леконт Тынық мұхитын жүзіп өтпекші. Ол қауіпті сапарға Жапонияның Тёси қаласынан аттанып та кетті. Леконт күн сайын 8 сағат жүзіп, шамамаен жарты жылдан кейін АҚШ жағалауына жетпекші. Алайда оны жолда түрлі қауіпке толы сындар күтіп тұр. Ал жүзгіш осындай қадамға бару арқылы адамдардың назарын жаһандық жылыну мәселесіне аудармақ. Сондықтан онымен бірге алыс сапарға 1 топ ғалым да аттанды. Олар мұхиттағы қоқыстарды зерттеп, Фукусима атом электр станциясындағы апаттың әсерін тексереді. Айта кетейік, Бенуа Леконт 1998 жылы Атлант мұхитын да дәл осылай жүзіп өткен болатын. Ол кезде француз 6 мың 400 шақырым жерді 73 күннің ішінде еңсерген. Сөйтіп, осы мұхитты жүзіп өткен бірінші адам болды. Бірақ ол кезде Леконт Франция жағалауына жеткен соң ендігәрі мұхиттарды жүзіп өтуге қайтадан шықпайтынын айтқан еді. Бенуа Леконт, жүзуші: - Сол сапардан соң 3-4 айдан кейін келесі жоспарлар туралы ойлай бастадым. Адамның физикалық тұрғыдан дайындығынан гөрі психологиялық әзірлігі маңызды ғой. Ол үшін үнемі жақсылықты ойлау керек.