Имамдарға жалақы төленеді
Фото: muslim.ru
Қырғызстан президенті Садыр Жапаров Бішкекте өтіп жатқан үшінші Халықтық құрылтайда имамдарға жалақы төлеу мәселесіне қатысты пікір білдірді, деп жазады Egemen.kz kabar.kg-ге сілтеме жасап.
Қырғыз президентінің айтуынша, 2025 жылдың наурыз айынан бастап имамдарға бастапқыда 8 мың сом, жыл соңына дейін 20 мың сом жалақы төлеу жоспарланып отыр.
«Бұл бағытқа қаржы бюджеттен бөлінбейді. Қырғызстан мұсылмандары діни басқармасы бұған дейін мән бермеген дереккөздер бар. Бұл қаржыны мешіттердің қызметіне, дәлірек айтсақ имамдарға бағыттағымыз келеді. Біз зайырлы мемлекет ретінде дінге араласпаймыз, ал дін өкілдері саясатқа араласпайды. Осыған байланысты біз республикалық бюджеттен қаржы бөле алмаймыз. Сонымен бірге, мемлекет өз мүмкіндігіне қарай Қырғызстан мұсылмандары діни басқармасына қолдау көрсетіп жатыр», деді Садыр Жапаров.
Көрші ел басшысы 2025 жылы Қырғызстан мешіттерінде электронды садақа жәшіктері орнатылатынын да атап өтті.
«Келесі жылы әрбір мешітке электронды жәшіктер орнатылады. Халық садақаны QR кодын пайдаланып телефон арқылы аудара алады. Сондықтан қасиетті үйлерде бұрынғыдай темір және ағаш жәшіктер болмайды. Қырғызстан мұсылмандары діни басқармасы электронды садақа жәшіктеріне жиналған қаржыны қайда жіберу керек екенін өздері шешеді», деді Қырғызстан президенті.
