Нью-Йорктегі ғимаратта қиял әлеміне жетелейтін бөлмелер ашылды
Алдағы уақытта Нью-Йорк халқы шексіз қиял әлеміне саяхаттай алады. Яғни арнаулы нысанға енген адам түс көргендей халде болады. Мұнда келушілер үшін түрлі тақырыптағы 9 бөлме жасақталған. Мысалы, бір бөлме сабын көпіршіктерімен толтырылған. Ал тағы бірі жүзу бассейніне ұқсайды. Тек судың орнына кішкентай доптар салынған. Бұлттың арасында жүргендей сезім сыйлайтын бөлме де бар. Пэйдж Соломон, Dream Machine инсталляциясының негізін қалаушы: - Мен адамдарға күнделікті күйбең тірлікті ұмыттыратын жерді ойлап тапқым келді. Тек демалып ғана қоймай рухани тұрғыдан байып, өз қиялдарына берілуіне ықпал еткім келді. Сондықтан осындай туынды жасауды жөн санадым.
