» » Қазақ қызы Америкада хоккей клубының бас бапкері атанды

Қазақ қызы Америкада хоккей клубының бас бапкері атанды

Қазақстан құрамасында өнер көрсететін Бұлбұл Қартанбаева енді «Princeton Tiger Lilies» деп аталатын әйелдер хоккей клубын жаттықтырады, деп хабарлайды «Хабар 24».
Бұлбұл Қартанбаева Жамбыл облысы Тұрар Рысқұлов ауданында дүниеге келген. 13 жасынан бастап хоккейге әуестенді. Кейін «Томирис» командасына қабылданып, жақсы қырынан танылды. Шеберлігі шыңдалды. Көп ұзамай ұлттық құрамаға шақырылады. Қазақстан құрамасының сапында жүріп әлемнің үздік хоккей лигаларының мамандарына ұнайды, білікті бапкерлер назарына ілігеді. Ал 2018 жылы канаданың «Калгари» клубынан ұсыныс түседі. Ал бір жылдан кейін америкалық «Метрополитен Риветерс» командасымен келісімшартқа отырды.
– Мұнда спортшыларды баптаудың әдіс-тәсілі Қазақстанмен салыстырғанда өзгеше. Мәселен, хоккейші тапсырманы аяғына дейін орындай алмаса, оған бәрібір «Жақсы жұмыс істедің, жарайсың!» деп, жігерлендіріп қояды. Бірақ мен қызметіме жаңадан кіріскен кезде, жаттығу жоспарына қатысты өз көзқарасымды айтып, қатал болатынымды ескерттім. Хоккейшілерге менің тәжірибем ұнаса керек. Олар менен Қазақстан, Еуропа, Азия мен Канададағы хоккейдің айырмашылығы жайлы сұрап жатады, - дейді ол.
Бұлбұлдың америкалық хоккей клубында ойнап жүргеніне небәрі 1 жыл ғана болды. Осы уақыт ішінде қазақ қызының қарым-қабілеті мен ерекше дарынын байқаған клуб басшылары отандасымызға жас хоккейшілер клубына бас бапкерді болуды ұсынған.
– Коронавирусқа байланысты хоккей маусымы аяқсыз қалды. Жарыс соңына жетпей тоқтады. Барлық спорт алаңдары жабылды. Қазір бірте-бірте жұмыс істей бастады. Алдағы жоспарым жайлы айтар болсам, ол хоккейден Ұлттық әйелдер лигасында ойнау. Осында 4-5 жыл өнер көрсетіп, бапкерлік тәжірибе жинағым келеді. Кейін туған елге оралуды қалаймын, - дейді Б.Қартанбаева.
Туған елден жырақта жүрсе де, Бұлбұл туған-туыс, достарын бір сәтке де ұмытқан емес. Мейрамдардың ешбірін қалт жібермей, әрдайым бәрін құттықтауға асық.
Барша қазақстандықты Елорда күнімен құттықтаймын. Бәріңізге сәттілік пен табыс тілеймін. Әрдайым армандарыңызға сеніп, соған ұмтылыңыздар. Ешқашан мойымай, алға қойған мақсаттарыңызға жете беріңіздер. Қазақстан алға! - дейді бас бапкер.


06 шілде 2020 ж. 311 0

PDF нұсқалар мұрағаты

№61 (9915)

11 тамыз 2020 ж.

№60 (9914)

08 тамыз 2020 ж.

№59 (9913)

04 тамыз 2020 ж.

Суреттер сөйлейдi

Кешкі бұлттар бейнесі
30 шілде 2020 ж. 164

Жаңалықтар мұрағаты

«    Тамыз 2020    »
ДсСсСрБсЖмСбЖс
 12
3456789
10111213141516
17181920212223
24252627282930
31