КТК-НЫҢ ҚЫРҒЫН КҮЛКІСІ
Жақында аудандық ішкі саясат бөлімінің мемлекеттік әлеуметтік тапсырысы шеңберінде «Қармақшы Жастары» жастар қоғамдық бірлестігінің ұйымдастыруымен ІІІ Интернационал ауылдық мәдениет үйінде аймақтық КТК жайдарман ойыны өтті.
Аудандық ішкі саясат бөлімінің маманы Серік Әбдісалімов, жайдарманшы Қайыржан Қыдырбек және «Қармақшы Жастары» жастар қоғамдық бірлестігінің төрайымы Гүлжазира Маханованың қазылық етуімен өткен өнер байқауына Дүр Оңғар, Иіркөл, Төребай би және ІІІ Интернационал, ауылдарының құрамалары қатысты.
Әділқазылар қойған талаптар бойынша өз өнерлерін ортаға салған жайдарманшылар сайыстың әр кезеңдеріндегі талаптар аясында сөз сайыстырып, сайыс көркін ашқан көңілді тапқыштар өздерінің үздік әзілдерімен көрермендерге көтеріңкі көңіл-күй сыйлады.
Жайдарманшылар сайысының қорытындысында әділқазылар шешімімен Иіркөл және Төребай би, ІІІ Интернационал командалары аудандық кезеңге жолдама алды.
Жеңімпаздар мен жүлдегерлер дипломдарымен және бағалы сыйлықтарымен марапатталады.
Нұрбай ЖАНӘДІЛОВ.
