Арманына асыққан Айжан

Апта басында Ш.Төлепова атындағы аудандық мәдениет үйінің ұйымдастыруымен Қазақстан Республикасы Тәуелсіздігінің 30 жылдығына орай «Арманыма асығамын» атты ән кеші өтті. Бұл ауданға танымал халықаралық, республикалық және облыстық байқаулардың жеңімпазы, «Алтын дауыс» иегері жас әнші Айжан Қыдырбектің ән кеші еді. Аудан халқының құрметіне бөленіп жүрген тамаша талант иесінің жеке концерті карантин талаптарына сай өткізілді.

Кештің мақсаты – көрермендерге көтеріңкі көңіл күй сыйлау және жастардың бос уақытын тиімді пайдалану.

Айта кетейік, жас әнші карантин уақытында әлеуметтік желі арқылы онлайн концерт өткізіп, көрермендерінің ыстық ықыласына бөленумен қатар көп дауыс жинаған. Биыл көптің сұрауымен, мәдениет үйінің қолдауымен алғашқы ән кешін өткізді. Жалпы, Айжан Қыдырбек үздіксіз шығармашылық ізденістің адамы. Репертуарын дамылсыз жаңартып, өз тыңдарманын тапқан. Бүгін де, талғампаз көрерменнің оң бағасын алды десек артық айтқанымыз емес.

Әндері мен алтын дауысы қалықтаған ән кешін ауданның жас режисері Мадияр Маханбетов жүргізсе, жұлдызды өнерпаздар шоғыры, әнші Ғалымжан Шәкизада, Әділет Бимұратұлы өнер көрсетті. Сонымен қатар Жазира Сәтбергенова жетекшілік еткен «Бастау би» тобы сахнаның көркін қыздырды.