Қар, жаңбыр, көктайғақ: Бірнеше өңірде қолайсыз ауа райы сақталады
15 қараша күні елдің басым бөлігінде жаңбыр және қар аралас жаңбыр жауады. Бірнеше өңірде қолайсыз ауа райы сақталады, деп хабарлайды Egemen.kz.
Тек Қазақстанның оңтүстігінде жауын-шашынсыз ауа райы күтіледі. Республика бойынша тұман, көктайғақ, желдің күшеюі болжанған.
Алматыда түнде және таңертең тұман түседі. Ал Алматы облысының оңтүстігінде, орталығында және таулы аудандарында тұман түседі. Таулы аудандарда желдің екпіні 15-20 м/с-қа жетеді.
Астанада кей уақыттарда аздаған қар жауып, көктайғақ болады. Түнде және таңертең тұман түседі.
Ақмола облысының шығысында қар жауып, көктайғақ болады. Түнде және таңертең облыстың солтүстігі мен шығысында тұман түседі.
Қызылорда облысының оңтүстік-батысында, солтүстігінде, Алматы облысының солтүстігінде, шығысында, Жетісу облысының оңтүстік-шығысында жоғары өрт қаупі күтіледі.
