ЖАРИЯ ТЫҢДАУ ӨТТІ
Жуырда К.Рүстембеков атындағы жыраулар үйінде «Қызылорда электр тарату тораптары компаниясы» АҚ ұсынған 2025 жылға арналған электрмен жабдықтау қызметі бойынша тариф бағасына жария тыңдау өтті. Оған арнайы Қазақстан Республикасы Ұлттық экономика министрлігі Табиғи монополияларды реттеу комитетінің Қызылорда облысы бойынша департаменті басшысының міндетін уақытша атқарушы Зура Сардарбекқызы, «Қызылорда электр тарату компаниясы» АҚ басқарма төрағасы Батыржан Көмекбайұлы, аудандық мәслихат төрағасы Әділ Қошалақов және бірқатар сала мамандары, ардагерлер мен кент тұрғындары қатысты.
Бүгінде облыстың Арал, Қазалы, Қармақшы, Жалағаш, Сырдария, Шиелі және Жаңақорған аудандарын және Қызылорда қаласын электр энергиясымен қоғамдық маңызы бар нарық субъектісі – «Қызылорда электр тарату тораптары компаниясы» АҚ қамтамасыз етеді. Қоғамдық маңызы бар нарықтағы субъектілер қамтамасыз етіп отырған электр энергиясының бағалары белгілі себептермен өсетін болған жағдайда хабарламамен шығуға құқылы. Баға белгілеу қағидаларының 4-тармағына сәйкес, субъект уәкілетті органның ведомствосына немесе оның аумақтық бөлімшесіне бағаға сараптама жүргізу үшін ақпаратты не алдағы уақытта тауарлар (жұмыстар, көрсетілетін қызметтер) бағаларының шекті бағадан жоғары көтерілуі және шекті бағаның көтерілу себептерін растайтын негіздеуші материалдарды қоса бере отырып ұсынады. Осыған байланысты, биылғы жылы 20 мамырда Табиғи монополияларды реттеу комитетінің Қызылорда облысы бойынша департаментіне 2025 жылдың 1 шілдесінен бастап электр энергиясымен жабдықтау қызметінің бағаларының өзгеретіні бойынша хабарлама ұсынады. Атап айтқанда, тұтынушылар топтары бойынша – тұрғындар үшін – 29,86 теңге, бюджеттік мекемелер үшін – 57,44 теңге, басқа да тұтынушылар үшін – 33,78 теңгеге өзгертіп ұсынады.
«ҚТ» ақпарат
