«Ана тілің – арың бұл, Ұятың боп тұр бетте. Өзге тілдің бәрін біл, Өз тіліңді құрметте» деп белгілі ақын, Қазақстанның Халық жазушысы Қадір Мырза Әли жырлағандай, өз тілімізге деген құрметіміз әр азаматтың жүрек түкпірінен орын алуы керек. Қазақстан халқының Тілдер күні мерекесі бастапқыда 22 қыркүйекте, ал «Қазақстан Республикасындағы мереке күндерінің тізбесін бекіту туралы» Қазақстан Республикасы Үкіметінің 2017 жылғы 31 қазандағы №689 қаулысына сәйкес, мереке 5 қыркүйекке – қазақ ағартушысы және ғалымы Ахмет Байтұрсынұлының туған күніне бекітілді. Тілдер күні – Қазақстанның барлық азаматтарының достығының, туыстық пен бірліктің белгісі, ал халықтар достығы, өзара түсіністік пен ынтымақтастық – мемлекет құрылысының басты тірегі.

Тіл – халықтың әл-ауқаты, ол ұлттардың бірлігі мен тұтастығына зор ықпал етеді. Тіл – білім беру құралы және адамдардың қарым-қатынасын байланыстыратын тірек.

Атаулы мерекеге орай Төретам кенті кітапханасында кітапханашы Айгүл Ермахан «Тілім менің – тірлігімнің айғағы» атты кітапханалық сағатын өткізді. Мақсаты – мемлекеттік тіл саясатының деңгейін көтеру. Тілге құрмет көрсетуге, оны ықыласпен үйренуге насихаттау. Іс-шараға мектеп оқушылары қатысып, тіл туралы терең толғаныстарын, өлеңдерін оқып, ойларын ортаға салды. Басқосу аясында «Тіл – тәуелсіздік тірегі» атты әдеби кітап көрмесінің таныстырылымы болып, оқушылар мемлекеттік тіл туралы мол мағлұмат пен тың деректер алды. Мемлекеттік тіліміздің мәртебесі үстем болсын!