Бүгін "AMANAT" партиясы Байқоңыр филиалының Партиялық бақылау комиссиясының мүшелері "Кедергісіз келешек" партиялық жобасы аясында Байқоңыр қаласындағы медициналық, қызмет көрсету мен білім мекемелерінде мүмкіндігі шектеулі жандар үшін жасалған жағдайлармен танысты.

Мүмкіндігі шектеулі жандарға қоғамда ыңғайлы жағдай жасау дегенді көбіміз ғимарат алдына пандус қою деп қана түсініп жүрміз. Алайда олай емес. Ғимаратқа дейінгі жол, кіреберіс есік, тіпті табалдырыққа дейін қимыл-қозғалысы аз адамдарға қолайсыздық тудырмауы тиіс.

Ал ғимаратқа кірген соң арнайы сары жолақтардың көмегімен мүмкіндігі шектеулі жандарға бағыт-бағдар берілуі керек. Бөлек дәретхана да қарастырылу қажет. Ал есіктердің ені 90 см-ден кем болмауы тиіс.

Бірақ, өкінішке орай, бұл талаптар көптеген мекемелерде сақталмаған.

Бүгінгі жүргізілген зерделеу жұмыстарының қорытындысына сәйкес мекеме басшыларына ескертулер жасалды. Анықталған олқылықтарды тез арада ретке келтіру жұмыстары комиссия тарапынан партиялық бақылауға алынды.