Обырды емдейтін отандық дәрі
Өлшеулі өмірдің үкіміндей онкологиялық аурулардың атының өзі естіген жанның үрейін туғызады. Ал осы дертті деніне жамаған жұрттың жай-күйін ойлау тіптен ауыр. Талай заманнан бері әлемнің небір білгір дәрігерлері табандап, талап қылып обырды жеңудің тың, тиімді тәсілдерін табуға тырысып-ақ келеді. Осы ғаламдық мәселені шешуге атсалысқан отандық ғалымдар еңбегінің нәтижесі таяуда белгілі болды.
Осынау ақжолтай жаңалықты Ғылым және жоғары білім министрі Саясат Нұрбек жеткізді. Оның айтуынша, обырға қарсы жаңа дәріні отандасымыз, ғалым Дос Сарбасов жасап шығарды.«Биотехнолог Дос Сарбасов Техас онкологиялық университетінің Андерсон зертханасында ұзақ уақыт жұмыс істеді. Ол жасушалық тамақтануға маманданған. Отандасымыз қатерлі ісік жасушаларының қоректік үдерісін бұзудың жолын таба алды. Бұл – онкологиялық аурулармен күресудің инновациялық тәсілі», деді С.Нұрбек.
Министрдің айтуынша, инновациялық дәріні алдымен қояндар мен тышқандарға сынаған. Сосын онкология университетінде қатерлі ісікпен ауыратын 15 адамға осы препаратты қолданып, сынақтың бірінші кезеңі өтті. Бәрі ойдағыдай болса, келесі жылы жаңа дәріні нарыққа шығару жоспарланып отыр екен.
«D-VС қатерлі ісікке қарсы отандық препарат әзірлеу» жобасы бойынша жасалып жатқан бұл дәрінің әлемде баламасы жоқ. Жаңа препарат обырдың ауыр түрлеріне душар болған науқастардың өмірін ұзартатын тиімді ем болады деген сенім мол.
egemen.kz
