"Үздік педагог" республикалық конкурсынан әріптесіміз үздік атанды

qarmaqshy-tany.kz ҚР Оқу-ағарту министрлігінің ұйымдастыруымен дәстүрлі "Үздік педагог" республикалық конкурсының марапаттау рәсімі өтті. Байқауға Сыр өңірінен облыстық кезеңнің қорытындысымен 10 педагог қатысқан болатын. Конкурс нәтижесімен 5 мұғалім «Үздік педагог» атағының иегері атанды.

Олардың қатарында Қызылорда облысы білім басқармасының Қармақшы ауданы бойынша білім бөліміне қарасты №80 мектеп-гимназиясының география пәнінің мұғалімі, білікті ұстаз Ниязов Серік Ұзақбайұлы да бар.

Серік Ұзақбайұлы білім беру саласында 16 жылдық еңбек өтілі бар тәжірибелі ұстаз. Кәсіби жетістіктері мол, оқушылары республикалық олимпиаданың шығармашылық байқаулардың жүлдегерлері. «Үздік педагог» атағын беру жөніндегі республикалық комиссия отырысының қорытындысы бойынша «Үздік педагог» атағына ие болды. Осы ретте бүгін Елордада өткен марапаттау рәсімінде Оқу-ағарту министрі Ғани Бейсембаевтың қолынан үздік педагогтерге арналған төсбелгі мен 1 000 АЕК ақшалай сертификатқа ие болды.

Әріптесімізді бүгінгі марапатымен құттықтай отырып, шәкірттеріңіз тек биік шыңдардан көрініп, еңбектеріңіздің ақтала беруіне шын жүректен тілектестігімізді білдіреміз!