Цой қазақстандық вакцинаны шығаратын зауыт қашан іске қосылатынын айтты
Денсаулық сақтау министрі Алексей Цой күзде Жамбыл облысында вакцина шығаратын зауыт іске қосылуы мүмкін екенін айтты.
“Жақын арада, тамыз-қыркүйек айларында деп отырмыз. Негізінде іске қосу-жөндеу жұмыстары аяқталды, қазір жабдықтың валидациясы жүріп жатыр және Жамбыл облысы әкімдігінің ақпараты бойынша қазір барлық регламенттік рәсімдер өтуде. Біз күзге қарай бұл зауыт іске қосылып, өз қуатын кезең-кезеңімен кеңейтеді деп ойлаймыз”, – деді министр Орталық коммуникациялар қызметінде өткен брифингте.
Ол зауыт Қазақстанды да, шет елдерді де коронавирусқа қарсы вакциналармен қамтамасыз ететінін атап өтті.
Отандық вакциналар шығаратын зауыттың құрылысы Жамбыл облысында 2020 жылдың маусым айында басталды. Зауыт 2021 жылдың I тоқсанында жұмыс істей бастайды деп болжанған. Осы жылдың мамыр айында облыс әкімі Бердібек Сапарбаев зауытты тестілік режимде іске қосу маусым айына белгіленгенін мәлімдеді.
