МҰҒАЛІМ МӘРТЕБЕСІ – БАСТЫ НАЗАРДА
ЖОСАЛЫ, 15 қаңтар – qarmaqshy-tany.kz Ұлағатты ұстаздардың еңбек жолында беделін жоғарылату мемлекеттегі білім беру саясатының басты бағыттарының бірі. Қазақстан Республикасының "ПЕДАГОГ МӘРТЕБЕСІ ТУРАЛЫ" Заңы – ұстаздардың қоғамдағы орнын айшықтай түсетін маңызды құжат болып табылмақ.
С.Есқараев атындағы №27 орта мектебінің ұжымы елімізде ұзақ қаралып, бірнеше күн бұрын қабылданған ҚР "Педагог мәртебесі туралы" Заңын талқылау мақсатында бас қосты. Мектеп директоры ЖАРАСОВА АҚМАРАЛ ДӘУРЕНБЕКҚЫЗЫ бұл заңның мұғалімдер үшін өте маңызды орын алатындығына тоқталып өтіп, заң мазмұнын жалпы түсіндіріп, салмақты тұстарына ерекше тоқталды.
21 баптан тұратын бұл заңда білім саласында абыройлы еңбек етіп келе жатқан, мәртебелі маман иелерін қағазбастылық пен қауырт жұмыстардан босатуға қатысты нақты шешімдер қабылданған. Сондай-ақ ата-ананың жауапкершілігін арттыру, бала құқығын қорғау және оқытушы-педагогтарға дөрекілік пен әдепсіз мінез-құлық танытқандарға әкімшілік айыппұл салынатындығы көрініс тапқан.
