Қазақ тілі ғұмырлы болсын десек, оны қазіргі заманға лайықтау қажет – Назарбаев
Қазақстандықтардың болашағы – қазақ, орыс және ағылшын тілдерін еркін меңгеруінде. Ал біз қазақ тілі ғұмырлы болсын десек, оны жөнсіз терминологиямен қиындатпай, қазіргі заманға лайықтауымыз қажет. Бұл туралы ҚР Президенті Нұрсұлтан Назарбаев Қазақстан халқына арнаған биылғы Жолдауында
Елбасының биылғы «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында 10 міндет қойылды. Жолдаудағы 7 міндет адами капиталды дамытуға байланысты.
Осы орайда Мемлекет басшысы 3 тілді еркін меңгеру өте маңызды екенін атап өтті.
«Қазақстандықтардың болашағы – қазақ, орыс және ағылшын тілдерін еркін меңгеруінде. Орыс тілді мектептер үшін қазақ тілін оқытудың жаңа әдістемесі әзірленіп, енгізілуде. Егер біз қазақ тілі ғұмырлы болсын десек, оны жөнсіз терминологиямен қиындатпай, қазіргі заманға лайықтауымыз қажет», - деді ол.
Сонымен қатар Нұрсұлтан Назарбаев терминдерді қазақ тіліне аудару барысында кездесетін мәселелерге тоқталды. Оның пікірінше, терминология тұрғысынан қазақ тілін халықаралық деңгейге жақындату қажет.
«Соңғы жылдары әлемде қалыптасқан 7 мың термин қазақ тіліне аударылған. Мұндай «жаңалықтар» кейде күлкіңді келтіреді. Мысалы, «ғаламтор» (Интернет), «қолтырауын» (крокодил), «күйсандық» (фортепиано) және тағы сол сияқтылар толып жатыр. Осындай аудармаларды негіздеу тәсілдерін қайта қарастырып, терминология тұрғысынан қазақ тілін халықаралық деңгейге жақындату керек», - деді Нұрсұлтан Назарбаев Қазақстан халқына арнаған Жолдауында.
