Баланың атын және тегін беру тәртібі

Бала – біздің болашағымыз. Ол дүниеге келген күннен бастап сол туған елінің азаматы деп танылады. Қазақстан Республикасының Неке (ерлі-зайыптылық) және Отбасы туралы» Кодексінің 63-бабында көрсетілгендей баланың ат алуға, әкесінің атын және тегін алуға құқығы бар. Балаға ат ата-анасының (немесе олардың орнындағы адамдардың) келісімі бойынша қойылады. Сонымен қатар балаға ата-анасының келісімі бойынша бөлек жазылған жағдайда қосарланған ат беруге де рұқсат етілген, бірақ ол екі аттан аспауы тиіс.

Баланың тегі ата-анасының тегімен айқындалады. Ата-анасының тегі әр түрлі болған жағдайда балаға ата-анасының келісімі бойынша әкесінің немесе анасының тегі беріледі. Ата-аналарының тілегі бойынша баланың тегі ұлттық дәстүрмен ескеріле отырып, баланың әкесінің немесе атасының атымен жазылады. Сонымен қатар балаға өзінің әкесінің аты тегі болған жағдайда, міндетті түрде бірінші тегі, одан кейін баланың атының жазылуына жол берілген, ал әкесінің аты жазылмайды. Баланың тегіне қатысты ата-аналарының арасында келіспеушілік туындаған жағдайда, сот тәртібімен шешіледі. Осы кодекстің 64-бабында егер баланың ата-аналары заңды түрде бөлек тұрса және баланың өзімен бірге тұратын ата-анасы оған өзінің тегін бергісі келсе, тіркеуші орган бұл мәселені ата-ананың екіншісінің пікірін ескерместен, баланың мүддесіне орай шешілетіні түсіндірілген.

Баланың дүниеге келуі жаңа өмірдің бастауы. ҚР Неке (ерлі-зайыптылық) және Отбасы туралы» Кодексінің 189-бабы бойынша баланың тууы ол дүниеге келген күннен бастап үш жұмыс күннен кешіктірмей тіркеліп, туу туралы куәлік беріледі. Сондықтан бала дүниеге келгеннен кейінгі оларды алғашқы құжаты туу туралы куәлікпен уақытында қамтамасыз ету ата-ананың парызы және міндеті. Соны ескерейік.