Жастар жаһандық үдеріске ілесуі керек

Ел президенті Қ.Тоқаев Қазақстан халқына «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» тақырыбымен Жолдау жолдады.

Аталмыш Жолдауда еліміздің ғылым, білім саласын жаңа технологиямен, инновациямен байланыстыру туралы мәселе қозғады. Өйткені елдің экономикасына да, әлеуметтік дамуына да ғылым саласының қосатын үлесі зор. Заманауи технологиялық қосымшалардың құзіретіндегі патенттер, технологиялар, өндірістер арқылы сапалы экономика қалыптасады. Сонымен қатар жасанды интеллект саласына да мән беріп, меңгеру дағдысын қолға алуды тапсырды. Бұл ретте жастар жаһандық үдерістің қыр-сырын меңгеруде алғырлық танытуы – заңдылық. Ел болашағының тұтқасын ұстайтын азаматтар бұл саланы толықтай меңгерсе, білім, ғылым саласына да тың өзгеріс пен соны серпіліс орын алары хақ. Ол үшін жастарға бағыт-бағдар беруде алдыңғы буын өкілдер де жаңашылдықтан хабардар болғаны дұрыс. Сонда ғана жастарды қолдау өз нәтижесін береді.