СУҒА ШОМЫЛУДЫҢ ҚАУІПСІЗДІК ЕРЕЖЕЛЕРІ ҚАНДАЙ?

Ата-ана балаларының суға түсу тәртiбiнiң ережелерiн уақытылы үйрету және балаларын су жағаларында қатаң бақылауда ұстау қажет. Осы орайда, аудандық Төтенше жағдайлар бөлімі суға түсу тәртiбiнiң ережелерiн есте сақтауға шақырады.

Ең бірінші су айдындарының жабдықталмаған және «Суға түсуге тыйым салынады» деген белгілері бар жерлерде шомылуға болмайды. Сондай-ақ масаң күйде суға шомылуға тыйым салынады. Жағажайда балаларды қараусыз қалдыруға, балалардың ересектерсіз суға шомылуына, жүзу шекарасын белгілейтін қалқы белгілерден асып жүзуге, шағын көлемді кемелер мен басқа да жүзу құралдарына қарай жүзуге, жүзуге арналмаған заттармен жүзуге, суға қайық, катер, айлақ, жағажай, табиғи құралымдардан (жартас, құз, қойтас, жақтау, қоршау және басқа да заттар), сондай-ақ осы мақсаттарға бейімделмеген құрылыстардан секіруге рұқсат етілмейді. Су объектілеріндегі жаппай демалу орындарының жұмыс уақытынан тыс немесе түнде суға түсуге, жалған көмекке шақырып айғайлауға, су айдындарындағы қауіпсіздік белгілерін алып тастауға, бүлдіруге немесе басқа дүние орнатуға болмайды.

Сонымен қатар спортқа бейімделмеген орындарда спортпен айналысуға, оның ішінде спорттық ойындар ойнауға, су айдындарын ластау мен қоқыстау, кір жуу, жанармай құю, көлік құралдарын жуу және жөндеуге, жағада және шешіну орындарында демалушыларды жарақаттауы мүмкін қоқыстарды қалдыруға болмайды. Судағы апаттан қорғанудың ең сенімді жолы – суда шомылу және қауіпсіздік ережелерін қатаң сақтау.

Түптеп келгенде, адамның өмірінен артық құндылық жоқ. Сондықтан да суға түскен кезде қарапайым ережелерді сақтау керек. Сонда ғана тілсіз жаудың алқымынан аман қалуға болады. Қазақтың «Сақтансаң, сақтаймын!» деген аталы сөзінің төркіні де – осы.