«ТАЗА СУ АЙДЫНЫ» АКЦИЯСЫ
Табиғат байлықтарына жататын су тіршілік иелерінің бірі – балық. Ал балықты қорғау үшін алдымен су айдындары таза болуы қажет. Елімізде жыл сайын көктемгі айларда балық шаруашылығы су айдындарында «Таза су айдыны» табиғат қорғау акциясын өткізу бекітілген.
Аталған акция тасталған балық аулау құралдарынан су айдындарын тазарту және жағалау аумақтарын жинау, сондайақ балық ресурстарын сақтау, балықтардың уылдырық шашуы үшін қолайлы жағдайлар жасау мақсатында өткізіледі.
Жақында аудандық орман шаруашылығы және жануарлар дүниесін қорғау мемлекеттік мекемесі, аудандық ауыл шаруашылығы бөлімі, облысаралық балық инспекциясы бірлесе отырып Ақтөбе ауылындағы жергілікті маңызы бар балық шаруашылығы су айдыны «Кенжалы» көлі мен Дүр Оңғар ауылындағы «Төлеген» көлінің жағалауына тазалық жұмыстарын жүргізді. Тазалық акциясы аясында 270 келі тұрмыстық қалдықтар жиналып, сыртқа шығарылды. Оған 6 маман, 2 автокөлік қатысты. «Таза су айдыны» табиғат қорғау акциясы жалғасуда.
Ерсін СӘДУҰЛЫ
