Тиімді жылжымалы медициналық көмек
qarmaqshy-tany.kz Қазақ атамыз «Қай жерің ауырса, жаның сол жерде» дегенді бекер айтпапты. Бас ауырып, балтыр сыздай қалса, маңдай тірейтін жер сол алдымен медициналық мекеме. Осыннан қаншама адам деніне шипа тауып, сауығып жатады. Дертінен айығу үшін ең бірінші науқастың диагнозы дұрыс қойылуы керек. Одан да бұрын әлі асқына қоймаған аурудың алдын алу бәрінен маңызды. Осы қағиданы мақсат еткен облыстық онкологиялық орталығы мамандарының жетекшілігімен жылжымалы медициналық кешен өткен аптада Жосалы кентінде болып, тұрғындарға тегін қызмет көрсетті.
Халыққа қызмет көрсету іс-шарасы – «Жылжымалы» медициналық кешендер және медициналық пойыздар арқылы медициналық көмек көрсету қағидаларын бекіту туралы» ҚР Денсаулық сақтау министрлігінің бұйрығына сәйкес ұйымдастырылған. Мақсаты – адамдарды жылжымалы медициналық зерттеу түрлерінен өткізу, онкологиялық аурулардың алдын алу және ерте сатысында анықтау болып табылады.
Тұрғындарға қызмет көрсетуде онколог, рентгенолог, УДЗ дәрігерлері мен рентген лаборант маманы аудан бойынша жалпы саны 160 келушіні қабылдап зерттеуден өткізсе, олардың арасынан 8-і қатерлі ісікке күмәнді ретінде анықталған. Сондай-ақ арнайы бағдарламамен 90 адам, МӘМС жүйесінде «сақтандырылмаған» мәртебесі бар 70 тұрғын денсаулығын тексерткен.
– Қалаға барып қаралуға кейде уақытымыз бола бермейді. Бірақ қарап тұрсақ, денсаулықтан артық не бар. Ауырсаң қандай күйге түсеріңіз белгілі. Жылжымалы кешен қызметіне көптен-көп рақмет айтамыз. Алдағы кезде де осындай тексерулер жүргізіліп тұрса, тіпті жақсы болар еді, – дейді кешен қызметін алған бір топ тұрғын.
«Қт» ақпарат
