Жемқорлықпен күрес – баршаға ортақ
qarmaqshy-tany.kz Өткен аптада Қармақшы ауданының қорғаныс істері жөніндегі бөлімінің жеке құрамымен сыбайлас жемқорлық құқықбұзушылықтың алдын алу мақсатында шымкент гарнизоны әскери полиция бөлімінің аға офицері, сыбайлас жемқорлыққа қарсы іс-қимыл жөніндегі капитан Ербол Айтбаевтың, Қызылорда гарнизонына қызмет көрсету жөніндегі әскери полиция бөлімшесінің аға офицері, сыбайлас жемқорлыққа қарсы әрекет ету жөніндегі әділет майоры Рүстем Жаймбаевтың қатысуымен іс-шара өткізілді.
Мақсаты – елімізді қорғау саласында өз үлестерін қосып жүрген әскери қызметшілер арасында сыбайлас жемқорлық және басқа да қылмыспен құқықбұзушылықтардың алдын алу, заң бұзушылықтарға жол бермеу.
– Осындай тиімді іс-шаралар арқылы заң бұзушылықтың алдын алып, сыбайлас жемқорлық әрекеттеріне жол бермеуіміз керек. Сыбайлас жемқорлық тәуекелін азайту және азаматтардың Қарулы Күштерге деген сенімін көтеруде жүргізіліп жатқан тиімді іс-шараларға да көп көңіл бөлген абзал, – деді әскери полиция қызметкері, капитан Ербол Жайынбайұлы.
Сондай-ақ еліміздегі сыбайлас жемқорлыққа қарсы саясатты қолдауға шақырып, бөлім басшылығына Қазақстан Республикасы Қарулы Күштерінің сыбайлас жемқорлыққа қарсы стандарттарының талаптарын сақтауды және сыбайлас жемқорлыққа қарсы іс-қимылды өз құзыреті шегінде барлық мемлекеттік органдар, ұйымдар, квазимемлекеттік сектор субьектілері мен лауазымды адамдар жүргізуге міндетті екенін ескертті.
А.БАЛМАНОВ,
Қармақшы ауданының Қорғаныс істері жөніндегі
бөлімі бастығының міндетін уақытша атқарушы
