Ashyq: Бүгіннен бастап жаңа шектеулер енгізілді
Covid-19 коронавирус инфекциясының жаңа штамы – «Омикрон» әлем елдерін әлекке салып, қауіпсіздік шараларын қатаңдатуға мәжбүрлеп жатыр. Тез тарап жатқан бұл штамм біздің елде әлі анықталмағанымен, қыр астындағы қауіптің алдын алуды назарда ұстау қажет. Сондықтан биыл 5 қаңтардан бастап қосымша іс-шаралар шеңберінде жекелеген объектілердің қызметіне енгізілетін жаңа шектеулер күшіне енеді.
Қазақстан Республикасының Бас мемлекеттік санитарлық дәрігерінің қаулысымен жұмыс және демалыс күндері сауда және ойын-сауық орталықтарына, сауда үйлеріне, сауда желілеріне (азық-түлік емес, сауда алаңы 6 мың шаршы метрден астам), сондай-ақ караокеге тек қауіпсіз «жасыл» мәртебесі бар қызметкерлер мен келушілердің кіруіне рұқсат етіледі. «Жасыл» мәртебелілер – вакциналау, сынама алынған сәттен бастап 7 күннен аспайтын теріс нәтижесі бар ПТР-тесті, тұрақты медициналық қарсы көрсетілімдері бар, соңғы 3 ай ішінде ауырып сауыққан адамдар. Яғни аталған нысандарға Ashyq қосымшасында мәртебесі «көк» түсті болып тұрған азаматтар кіре алмайды.
Қабылданған шаралар коронавирустың «Омикрон» түрінің таралу және жұғу жылдамдығын ескере отырып, алдын алуға негізделген. Бұл жаңа штамм қазірдің өзінде әлемнің 110 елінде табылды.
«Омикрон» штамының қарқынды таралуы бірқатар елдің денсаулық сақтау жүйесіне шамадан тыс салмақ салып отыр. Осыған байланысты қабылданып отырған шаралар эпидемиялық жағдайдың тұрақтылығын сақтауға, аурулар санының өсу қаупін азайтуға, неғұрлым қатаң шектеу шараларын енгізуге жол бермеуге бағытталған.
Коронавирустың бұл түрінің жұқпалылығы «Дельта» нұсқасына қарағанда бес есе жоғары екенін есте сақтау керек, қайта жұқтыру қаупі жоғары. Дүниежүзілік денсаулық сақтау ұйымының болжамы бойынша ауру бірнеше айдың ішінде бүкіл әлемге таралуы мүмкін.
