«Серіктес директорлар» лигасы құрылды

Облыстық білім басқармасының басшысы Ақзира Бақтыбайқызының бастамасымен құрылған “Серіктес директорлар” лигасының жұмысы бізде де жалғасын табуда.

Ауданның 9 мектебінен құрылған лига жұмысы тіршілікті түлетіп, табиғатқа жан бітірген Ұлыстың Ұлы күні – Наурыз мерекесі қарсаңында басталды. Халқымыздың терең тағылымы мен танымын бойына сіңірген тарихымыздың ұлттық дәстүріне арналған екі күндік шара өтті. «Қош келдің, Әз-Наурыз» тақырыбымен «Наурыз келді ауылға» бағдарламасы аясында 17 наурызда ұлттық спорт ойындарынан сайыс және 18 наурызда ұлттық салт-дәстүр рәсімдерінен көрініс өткізілді. Шараға қатысқан лига құрамындағы 9 мектеп ұстаздары арасындағы белсенділік пен қызығушылық шараның өз мақсатына жетуіне керемет қолдау болды.

Білім беру саласында елеулі өзгерістерге жетелейтін ауқымды реформалар жасалуда. Біздің мақсатымыз – ұлт білімін жан-жақты жаңғырту. Облыстық білім басқармасының қолдауымен «Серіктес директорлар» лигасының құрылуы да білім беру ұйымдарының серіктесе отырып, түрлі жаңа форматтағы шараларды тың идея­лармен ұйымдастырып, жаңғыру мен жаңару бағытындағы жұмыстарды атқаруға өз үлесін қосу баспалдағының бірі деп ойлаймыз. Себебі серіктесе жұмыс істеу ұжымдар арасындағы ахуалды ғана емес, өзара байланыс пен сенімділікті, өзара жұмыс жасау­да қолдау мен жаңаша көзқарасты қалыптастыруда үлкен серпін болды. Осы тұста ауданымызда лиганың құрылуы мен жұмысына қолдау көрсеткен аудандық білім бөлімінің басшысы Дастан Мырзабекұлына риясыз алғысымызды білдіреміз.