Мехикода бас сүйектерден тұрғызылған дуал табылды

Мехикода адамның бас сүйектерінен тұрғызылған қабырға табылды. Бұл туралы Мексиканың археология және тарих ұлттық институтының сайтында жазылды.
Дуал Гватемала көшесінің астында табылыпты. Қабырғаның ұзындығы 34 метр. Институт маманы Рауль Баррердің айтуынша, бұл нысан 15-16 ғасырларда ацтектер кезінде тұрғызылған. Бұны олар «цомпантли» деп атаған деседі. 
Ғалымдар әзірге тек 34 адамның бас сүйегін тапты. Сүйектердің көбі жас жігіттердікі, ішінде әйелдер мен балалардың сүйектері де бар. Бұлар ацтектердің жауларының бастары болжанып отыр. 
Археологтардың айтуынша, нысандардың көбі Ацтектер империясын испандар жаулап алғаннан кейін жойылып кеткен. Археологиялық қазба жұмыстары аяқталған соң бұл жерді жергілікті тұрғындар мен туристер тамашалай алады.