Қазақстандықтар танымал интернет-дүкендері iHerb және Wildberries-те бағаның күрт өскенін айтып шағымдануда, деп хабарлайды Stan.kz ақпарат агенттігі. 


Желі қолданушылары iHerb пен Wildberries-те заттардың қымбаттап кеткенін қызу талқылауда. Олар бағалардың артуын Қазақстанда 2022 жылдан бастап енгізілген жаңа “Google салығымен” байланыстыруда.
Айта кетсек, аталмыш салықты қазақстандықтарға цифрлық тауарлары мен қызметтерін сататын әлемдік ғаламтор алпауыттары төлеуі тиіс. Яғни, енді шетелдік интернет-компаниялар Қазақстанда тапқан ақшаға қосымша құн салығын (ҚҚС) төлеуге міндетті болады. ҚҚС мөлшері сатылған тауарлар мен қызметтер сомасының 12%-ын  құрайды.
“Үкімет “Google салығы” қазақстандықтарға тікелей әсер етпейді деп сендірген болатын. Олар бұл салықты ұйымдар төлейді деген. Алайда енді шетелдік интернет-дүкендер бағаны 12%-ға арттырып жіберді. Түптеп келгенде, Қазақстан үкіметі шетелдік ұйымдарға емес, өз азаматтарына салық салып отыр”, – деп жазды желі қолданушысы. 
“Әдеттегідей заңды қабылдағанда барлық жағдайлар ескерілмеді. Әрине, ұйымдар өз қалталарынан емес, сатып алушылардың есебінен төлейді. Бірақ біз дәл сол 12%-ды үнемдеу үшін желіні пайдаланатын едік”, – деп жазды тағы бір Facebook пайдаланушысы.